މުލަކަތޮޅު ދިއްގަރު އިޙްތިސާސް ތެރޭގައި އިންޓެގްރޭޓެޑް ޓުއަރިޒަމް ޒޯން ތަރައްޤީ ކުރުމާއި ގުޅޭ

މުލަކަތޮޅު ދިއްގަރު އިޙްތިސާސް ތެރޭގައި އިންޓެގްރޭޓެޑް ޓުއަރިޒަމް ޒޯންއެއްގެ ގޮތުގައި ތަރައްޤީ ކުރުމަށް ކަނޑައެޅިފައިވާ ފުންޕަރުފަޅުގައި އިނޓެގްރޭޓެޑް މޮޑެލްއަށް ރިސޯޓެއް ތަރައްޤީ ކޮށް އޮޕަރޭޓް ކުރާނެ ފަރާތެއް ހޯދުމަށް ކުރިޔަށްގެންދެވުނު ބިޑިންގް ޕްރޮސެސް ނިމި މިއަދު ވަނީ ބިޑް ކާމިޔާބު ކުރި ފަރާތް ކަމުގައިވާ ފްލެކްސްއިންކް ޕްރައިވެޓް ލިމިޓެޑަށް މިޕްރޮޖެކްޓް އެވޯޑް ކުރެވިފައެވެ.

2023 ޖޫން 21 ވަނަ ދުވަހު ދިވެހި ސަރުކާރުގެ ގެޒެޓްގައި ކުރެވުނު އިއުލާނާއި ގުޅިގެން ތިން ފަރާތަކުން ޝައުޤުވެރިކަން ފާޅުކޮށް ބިޑް ޑޮކިއުމަންޓްސް ގަނެފައި ވެއެވެ. މި ތިންފަރާތުން ހުށަހެޅި ބިޑްތައް އިވެލުއޭޓް ކުރުމުން މީގެ ތެރެއިން ދެފަރާތަކުން ހުށަހެޅި ބިޑްތަކުގައި ފުރިހަމަވާންޖެހޭ ލިޔެކިޔުން ފުރިހަމަވެފައި ނެތުމުގެ ސަބަބުން އެ ބިޑްތަކަކީ ނޮންރެސްޕޮންސިވް ބިޑްތަކެއް ކަމުގައި ކަނޑައެޅިފައި ވެއެވެ. އަދި ތިންވަނަފަރާތް، ފްލެކްސްއިންކް އިން ހުށަހެޅި ބިޑް އިވެލުއޭޓްކޮށް ބިޑް ކޮމެޓީގެ ނިންމުމާއިއެއްގޮތަށް ވަނީ އެވޯޑް ކުރެވިފައެވެ.

ފްލެކްސްއިންކް އިން ހުށަހަޅާފައިވަނީ ފުންޕަރު ފަޅުން 10 ހެކްޓަރުގެ ސަރަޙައްދެއް ހިއްކުމަށް ލީސް އެކުއިޒިޝަން ކޮސްޓްގެ ގޮތުގައި 500،000.00 (ފަސްލައްކަ) ޔޫއެސް ޑޮލަރު ނުވަތަ 7،710،000.00 (ހަތްމިލިއަން ހަތްލައްކަ ދިހަހާސް) ރުފިޔާ އެވެ. ކުލީގެ ގޮތުގައި ހުށަހަޅާފައިވަނީ އަކަމީޓަރަކަށް އަހަރަކަށް 8.00 (އަށެއް) ޑޮލަރެވެ.

ބިޑް އެވޯޑް ކުރެވިފައިވާ ފަރާތަށް ލީސް އެކުއިޒިޝަން ކޮސްޓް ދެއްކުމަށް ބިޑް އެވޯޑްކުރާ ދުވަހުން ފެށިގެން 60 (ފަސްދޮޅަސް) ދުވަހުގެ މުއްދަތެއް ދެވޭނެއެވެ. މިމުއްދަތުގައި ލީސް އެކުއިޒިޝަން ކޮސްޓް ކައުންސިލަށް ދެއްކުމުން އެވޯޑް ކުރެވިފައިވާ ފަރާތާއި އެކު ކުއްޔަށް ދިނުމުގެ އެއްބަސްވުން ޤާއިމް ކުރެވޭނެއެވެ. އެއްބަސްވުން ޤާއިމް ކުރެވޭ ތާރީޚުން ފެށިގެން ރިސޯޓް ތަރައްޤީކޮށް ޚިދުމަތް ދިނުމަށް 30 (ތިރީސް) މަސްދުވަހުގެ ގްރޭސް ޕީރިއަޑްއެއް ދެވޭނެއެވެ. ގްރޭސް ޕީރިއަޑް ނިމުމުން ކުލީގެ ގޮތުގައި ކައުންސިލަށް އަހަރަކު 800،000.00 (އަށްލައްކަ) ޑޮލަރު ނުވަތަ 12،336،000.00 (ބާރަ މިލިޔަން ތިންލައްކަ ތިރީސްހަހާސް ރުފިޔާ) ލިބެމުންދާނެއެވެ. ކުލީގެ އެއްބަސްވުން އެކުލަވައި ލެވޭނީ 50 (ފަންސާސް) އަހަރުގެ މުއްދަތަކަށެވެ. މީގެ އިތުރުން ބިޑް ކާމިޔާބު ކުރި ފަރާތުން ބިޑް އެވޯޑް ކުރުމުގެ ޙަފްލާގައި، ދިއްގަރު ފަޅުތެރޭގައި މިރަށުގެ ރައްޔިތުން ޕިކްނިކް ދާނެ ޕިކްނިކް އައިލެންޑެއް ތަރައްޤީކޮށް ދެއްވާނެކަމަށް ވަނީ ވިދާޅުވެފައެވެ.

ރަށާއި ކައިރީގައި ފަތުރުވެރިކަމުގެ ސިނާއަތު ތަރައްޤީ ވުމަކީ ރަށުގެ ޒުވާނުންގެ ތެރެއިން އާއިލާއާއި ދުރުގައި ފަތުރުވެރިކަމުގެ ސިނާޢަތުގައި މަސައްކަތްކުރާ ގިނަ ޢަދަދެއްގެ ޒުވާނުންނަށް ވަޒީފާ އަދާކުރަމުން ފަސޭހައިން އާއިލާއާއި އެކު ވަގުތުހޭދަކުރުމަށް ހުޅުވާލެވޭ ވަރަށް ތަނަވަސް ދޮރެކެވެ. އަދި ރަށުގެ ވިޔަފާރި ތަކާއި މަސައްކަތްތެރިންނަށް އެމީހުންގެ ވިޔަފާރިއާއި މަސައްކަތްތަކުގެ ނަފާ އިތުރު ކުރުމަށް ހުޅުވާލެވޭ ދޮރަކަށް ވެގެންދާނެއެވެ.

މިޕްރޮޖެކްޓާއިއެކު ކައުންސިލްގެ ޢާމްދަނީ އިތުރުވެ ދައުލަތުން ދޭއެހީއަށް ބަރޯސާވުން ކުޑަކޮށް ރައްޔިތުންގެ މަންފާއަށް ގިނަ ތަރައްޤީގެ ޕްރޮޖެކްޓްތައް ހިންގުމުގައި ކައުންސިލަށް ވަރަށްބޮޑު މާލީ އެހީތެރިކަމެއް ލިބިގެންދާނެއެވެ. ކައުންސިލުން އެދެނީ ކައުންސިލްގެ އިޙްތިސާސްތެރޭގައި ހުރި ވަޞިލަތްތަކުގެ ބޭނުން އެންމެފުރިހަމަޔަށް ހިފައި އޭގެ މާލީފައިދާ ހުރިހައި ރައްޔިތުންނަށް ކުރާނޭފަދަ މިކަހަލަ އިތުރު މަޝްރޫއުތައް ހިންގައި މިރަށަކީ މިހާރަށްވުރެ ވަސީލަތްތައް ފުރިހަމަ ދިރިއުޅެން ހިތްފަސޭހަ ތަނެއްގެ ގޮތުގައި އަވަހަށް ތަރައްޤީ ވެގެން ދިއުމެވެ.

07 ސެޕްޓެމްބަރ 2023